Aequitas

COSE NOVE

Ll’uocchie poso ‘ncopp’ a sta rena ‘nfosa,
me ‘ncanta ‘o mare ca  sempe va e vene,
trasporta cose scavanno pertose
pure a stu core ca nun po’ fa bene.
 
E comme a ll’onna ca s’aggrappa  ‘a rena
e vene  trascinata ancora a  mare,
songh’io ca  ‘ncatenata a chesta pena ,
 cerco ‘e truvà penzieri  meno amari.
 
So’ ccose nove ca contano ll’onne,
 ‘o mare ‘e ddice doppo na tempesta,
ca mò sereno  me sceta a stu suonno
purtanneme nu poco d’aria ‘e festa.